Nýtt ár og ný ævintýri

Gleðilegt ár kæru fjölskylda og vinir!

Jólin fóru vel með okkur fjölskylduna í Lancaster, við borðuðum vel og nutum lífsins sem og um áramótin sem voru þó með rólegasta móti.  Rósa systir Ingu og Marwan maðurinn hennar eignuðust strák þann 27.desember, sá stutti "átti" reyndar ekki að koma fyrr en 11.janúar en því var flýtt af heilsufarsástæðum.  Móður og barni heilsast vel og ég (Inga) fæ ekki leið á því að skoða myndir af honum á barnalandssíðunni hans.  Til hamingju Rósa og Marwan

Við vorum eina fólkið í okkar götu sem skaut upp einhverjum flugeldum auk þess sem okkur fannst eins og Lancasterbúar væru almennt rólegir í flugeldunum.  Líklega skýtur meðal fjölskylda á Íslandi upp fleiri flugeldum en við heyrðum í eða sáum um áramótin   Til að fá útrás fyrir blysgirni okkar hjóna þá stilltum við á BBC Scotland og horfðum á flugeldasýninguna við Edinborgarkastala, hún var sko ekkert slor.

Siggi reynir að læra eins og hægt er, hann fer í próf núna föstudaginn 8.janúar og svo eru verkefnaskil 11., 14., 15. og 18. janúar svo það er nóg að gera hjá honum.  Inga og Þórir Snær hafa ofanaf fyrir sér á daginn með því að leika, teikna, leira, horfa á sjónvarpið og fleiru.  Stuð-stuðull húsmóðurinnar hefur lækkað síðustu vikur þar sem ég er með leiðinlega verki í mjaðmagrindinni.  En nú styttist í að settur dagur fyrir fæðingu renni upp, 22.janúar, svo vonandi kemur sú stutta fljótlega eftir það ef hún verður þá ekki komin fyrr....sem væri óskandi svona okkar á milli

Hanna og Úlli, foreldrar Sigga koma til okkar 15. janúar og verða fram til 1. febrúar.  Það verður æðislegt að fá þau til okkar og sýna þeim hvernig við búum hér í Lancaster og ekki síst bara að fá þau til okkar því hvað er betra en að hafa fólkið sitt hjá sér  

Þann 22.janúar verður Urður Eva systirdóttir mín (Ingu) 1 árs og mikið væri ég til í að vera með henni og foreldrum að því tilefni, það verður því að bíða enn um stund.  Ekki ólíklegt að við verðum á Íslandi eftir ár og þá mætum við galvösk í afmælið hennar.  Ég vona því svolítið að ég muni ekki eiga þann 22.janúar svo Urður Eva fái að eiga sinn dag og litla frænkan sem fæðist hér í Lancaster eigi sinna dag líka

Við látum vita þegar eitthvað fer að gerast í fæðingarmálum...annaðhvort rétt áður eða með fréttum að "komu drottningarinnar".

Alvöru jólasnjór fellur í Lancaster / A Proper Christmas Snow in Lancaster

Við tókum þessar myndir fyrir tíu mínútum utan við húsið okkar.  Sannarlega jólalegar!

We took these photos only ten mintues ago outside our house.  Now it sure looks like Christmas!

Síðustu dagar og fréttir af fjölskyldunni í Lancaster

Líkt og hjá ykkur flestum hefur desember mánuður liðið óskaplega hratt hér hjá okkur í fjölskyldunni að Rutland Avenue.  Siggi stóð í ströngu ásamt verkefnavinnuhópum framan af mánuðinum en hann skila tveimur stórum verkefnum 8. og 10. desember enn þann dag kláruðust líka fyrirlestar haustannarinnar.  Inga og Þórir Snær hafa verið dugleg að baka smákökur, skreyta heimilið og kaupa jólagjafir og undirbúa jólin.    Þann 10. desember buðu Þórir og Inga vinum okkar sem búa á Rutland Avenue 49 í piparkökuskreytingarpartý, úr varð hið skemmtilegasta boð þar sem Þórir Snær og Alice sem verður 3 ára nú í janúar fóru á kostum í listrænum tilþrifum auk þess sem þau léku sér saman og skemmtu sér vel.  Ég er alveg viss um að hvar svo sem fjölskyldan verður niðurkomin á aðventu á komandi árum að þá munum við halda svona piparkökuskreytingarboð aftur.

Siggi hefur útbúið sér vinnuplan til að fylgja yfir jól, áramót og fram í janúar þar sem hann þarf að skila 4 einstaklingsverkefnum og taka eitt próf í janúar auk þess sem von er á litlu stelpunni okkar í heiminn.  Eins gott að hann er duglegur að læra til að ná að klára allt sem þarf á réttum tíma.  Inga stefnir því á að halda þeirri stuttu í bumbunni þar til allavega 18.janúar en þá á hann að skila síðasta verkefninu.  Hanna og Úlli (foreldrar Sigga) stefna svo á að koma til okkar í janúar og vera hjá okkur þegar kemur að fæðingunni og sjá um Þóri Snæ, óskaplega góðar fréttir þar sem þar með er síðasti kubburinn kominn í "púslið" og allt klárt fyrir komu þeirrar stuttu.  Annars vorum við hjá ljósmóðurinni okkar síðasta fimmtudag og þá komst hún að því að líklega er dóttirin sitjandi í bumbunni en ekki komin með höfuðið niður (eins og hún "ætti að vera"), af þeim sökum eigum við tíma hjá ljósmóðurinni næsta fimmtudag, Aðfangadag, þar sem athugað er hvort hún hefur snúið sér eða hvort frekari rannsókna og vending er þörf.  Ef raunin er sú að hún verður enn sitjandi í næstu viku þarf að snúa henni eða ákveðja dag fyrir keisaraskurð þar sem ekki er tekið á mótið börnum sem eru í sitjandi stöðu.  Greinilegt að sú stutta ætlar að láta hafa svolítið fyrir sér.

 Á fimmtudagskvöldið var, 17. des. héldum við matarboð fyrir annan verkefnavinnuhóp Sigga.  Skemmtilegt alþjóðlegt kvöld þar sem við frá Íslandi, ein frá Indlandi, Einn frá Rússlandi og tvö frá Nígeríu borðuðum mexikanska súpu og franska súkkulaðitertu.  Einstaklega skemmtilegt kvöld þar sem allir nutu vel bæði matar og samvistar við góða félaga.

Frúin hefur átt betri daga en í dag...

...sem er svolítið fúlt þar sem ég svaf vel í nótt og vaknaði úthvíld.  Hinsvegar er líðanin þessa stundina alveg afleit, mér líður svolítið eins og ég sé að verða veik (einhver myndi þá líklega segja að ég væri orðin það).  Þoka og þungi í höfðinu, uppköst og almennt þróttleysi, úff.... og ekki beint tíminn til þess að verða veik, ekki það að það er í raun aldrei tími til þess að verða veik.  Núna er rétt rúmur 1.5 mánður í settan fæðingardag janúardömunnar okkar, nóg að gera á heimilinu og Siggi á kafi í verkefnavinnu með tveimur vinnuhópum.  Þegar hópverkefnunum lýkur taka við einstaklingsverkefni og eitt próf.  Síðasta verkefninu á að skila 18.janúar svo vonandi verður sú stutta til friðs fram að því svo Siggi nái að einbeita sér að náminu og skila öllu á réttum tíma.

Skipulagi dagsins í dag hefur verið breytt úr þrifum og bakstri yfir í rólegheit og kúr við sjónvarpið, greyið Þórir Snær verður að þola það að mamman verði ekki sú hressasta í dag.  Hann er samt svo yndislegur og rólegur að ég hef ekki stórar áhyggjur af honum, alveg bestur í heimi

Stóri áfanginn síðasta fimmtudag

Það kom að stóru stundinni síðasta fimmtudag þann 26. nóvember klukkan 15:00.  Ég útskrifaðist með MSc gráður (master) í Management of Training and Development sem gæti útlagst sem Master í stjórnun starfsþjálfunar á íslensku frá Edinborgar háskóla.

Útskriftardagurinn var ljómandi, við Þórir byrjuðum á því að skella okkur í klippingu um morguninn.  Því næst var að gera sig klára fyrir athöfnina, feðgarnir skutluðu mér á staðinn og fóru svo í smá bíltúr svo Þórir Snær næði að sofna smá (þar með yrði hann hressari um kvöldið).  Athöfnin var skemmtileg og gekk hratt og vel. Á meðan var Þórir í pössun hjá Lindu og Bjarna vinum okkar, þeim sem við gistum hjá.  Þar var heldur betur líf og fjör að venju, Þórir Snær alsæll að vera með krökkunum.  Um kvöldið fórum við út að borða á veitingastaðinn Gusto með Önnu sem var nágranni okkar í Edinborg og mömmu hennar.

Á föstudeginum skelltum við okkur í miðbæinn þar sem búið var að opna jólamarkaðinn, skemmtilegt að kíkja á stemninguna þar.  Einnig fórum við í góða ferð í IKEA þar sem barnarúm og kommóða var keypt fyrir dömuna sem von er á í janúar.  Um kvöldið keyrðum við heim til Lancaster.  Þreytt og sæl eftir góða ferð.

Þórir Snær og ensk barnalög

Uppáhalds lag Þóris Snæs þessa dagana er lag sem við mæðgin lærðum á "krakkamorgnum" (sem eru reyndar bæði fyrir og eftir hádegi).  Lagið er að sjálfsögðu á ensku en Þórir töffari er farinn að syngja með á fullu:

Zoom zoom zoom, we're going to the moon

Zoom zoom zoom, we'll be there very soon

Five, four, three, two, one (segir þetta hátt og skýrt og notar fingurna til að telja niður)

ZOOM (og þá er krökkunum lyft upp í loftið eins og eldflaug á leið til tunglsins)

 Svo virðist sem þau orð sem stúfurinn er að byrja nota séu að stórum hluta á ensku, greinilegt að við hjónin og það sem við höfum að segja er ekki mjög spennandi.  En við erum ekki áhyggjufull yfir þessu, þ.e. að enskan komi á undan.  Þegar 2ja ára stúfur er að læra tvö tungumál þá er eðlilegt að talkunnáttan komi ekki jafnt fram með bæði tungumál.  Þórir Snær skilur samt sem áður allt sem við segjum við hann (sem er á íslensku) svo nú er bara að gefa honum tíma til þess að vinna úr öllu saman

Með góðan gest í heimsókn

Bjössi frændi (móðirbróður Ingu) kom til okkar síðasta miðvikudag og fór aftur heim til Íslands í dag.  Búið að vera gaman að fá hann til okkar og ekki síst fyrir þá Þóri Snæ að kynnast, en þeir eru miklir vinir eftir dvöl frændans hjá okkur.

Takk fyrir samveruna Bjössi, verður gaman að sjá þig aftur hjá okkur næsta vor/sumar

Komin með nýja leigendur

Mikið er það yndislegt þegar hlutirnir ganga hratt og vel fyrir sig.  Við erum semsagt búin að fá nýja leigendur sem taka við íbúðinni okkar á Miklubrautinni um næstu áramót.  Þökk sé Facebook .

Nýju leigendurnir eru ungt par í námi sem bæði vinna með skólanum.  Ég er tengd mömmu stelpunar á facebook, hún sá þegar ég auglýsti íbúðina og hafði strax samband við mig.  Ég kenndi stelpunni þar að auki svo ég þekki hana aðeins auk þess að þekkja til hennar í gegnum mömmuna.

Mikill léttir fyrir mig óléttu konuna sem reynir að stjórnast í og redda málum á milli landa

Íbúðin okkar á Miklubraut 70 til leigu

Staðan er sú að parið sem tók íbúðina okkar á Miklubrautinni til leigu um miðjan júlímánuð eru búin að segja leigunni upp (af persónulegum ástæðum).  Íbúðin er því til leigu og eftir því sem við best vitum getur hún verið laus fljótlega þrátt fyrir að uppsagnartíminn séu 3 mánuðir.

Þetta er nýuppgerð 2 herbergja íbúð sem skiptist í hol/eldhús, baðherbergi með stórum sturtuklefa, mjög rúmgott svefnherbergi og stofu.  Íbúðin er sem áður segir nýuppgerð, björt með mjög gott skápapláss.  Þvottavélin okkar fylgir með sem og kælir/frystir, "allt" í eldhúsið og helstu húsgögn.

Verð á mánuði eru 105 þúsund krónur.  Innifalið er allt ofantalið, hússjóður, hiti, þrif á sameign og Securitas heimavarnarkerfi.

 Endilega hafið samband ef þú/þið hafið áhuga eða þekkið einhvern sem hefur áhuga á að leigja frábæru íbúðina okkar.

Daglegt líf á Rutland Avenue

Lífið hefur sinn vanagang sem er ósköp ljúft.  Siggi skólastrákur er á fullu í skólanum og mætir þar að auki í Tai Chi, svass og skokkar líka við og við, frúin veltir því fyrir sér hversu "hoj og slank" húsbóndinn verður í lok námsársins.  Frú Inga er meira eins og jólakúla í laginu þó það breytist í lok janúar þegar nýjasti fjölskyldumeðlimurinn fæðist.

Dagarnir hjá okkur Þóri Snæ eru huggulegir, við reynum að vera dugleg við að mæta á krakkamorgna hér í bænum, fara í gönguferðir og leika okkur hér heimavið.

Í kvöld er Siggi á leið út á lífið með bekknum sínum þar sem hópurinn er með Hrekkjavökugleði, verður spennandi að sjá og heyra hversu margir mæta í búningum.

Eitt sem frúin hefur mikinn áhuga á þessa dagana er að komast að ÖLLUM góðum ráðum til að auka úthald og orku.  Endilega látið mig vita ef þið lumið á einu slíku.

Frú Inga Master

Já það er komið á hreint að ég er að fara útskrifast með mastersgráðu þann 26. nóvember næstkomandi .  Mikið óskaplega er ég hamingjusöm með að hafa náð þessu markmiði mínu, ég hef reyndar ekki verið hrædd um að falla en að fá þessa staðfestingu frá skólanum er endalust notalegt.  Við fjölskyldan stefnum því á ferð til Edinborgar til að mæta á útskriftina, Þórir Snær verður þó líklega í pössun á meðan við Siggi verðum við útskriftarathöfnina sjálfa og svo getur verið að deildin mín verði með smá móttöku fyrir okkur útskritarnemana.

Eins og segir í frægri íslenskri bíómynd:..."ef það er ekki tilefni til að skála Salómon..."

 Ég er semsagt að útskrifast með Mastersgráðu í Stjórnun Starfsþróunar (MSc in Management of Training and Development).....JEY!!!!

Nýjar myndir á barnalandssíðunni hans Þóris

Ég kláraði að vinna upp "halann" á barnalandi nú síðdegis.  Nýjustu albúmin eru september og til 21.október.  Ég stefni á að setja aftur inn myndir um næstu mánaðamót og halda okkur á réttri braut héðan í frá.... allavega þann tíma sem ég er heimavinnandi mamma  

Ekki var það hlaupabóla...

...en samt er sá stutti lasinn.  Þórir Snær er sem betur fer orðinn hitalaus en kvefið hefur aukist auk þess sem hann er enn með smá útbrot á skrokknum en þau hafa minnkað mikið.  Í gær og fyrradag var Þórir hress framan af degi, fékk sér blund og var alveg ómögulegur eftir blundinn.  Vælinn og allt ömurlegt sem gert var.  Í dag var þessu öfugt farið, ósköp stúrinn framan af en í fínu formi seinni partinn.  Þar sem hitinn er búinn þá fékk hann sér ekki blund í dag og því sofnaður nú í kvöld á góðum tíma.  Yndislegt að eiga þá kvöldið fyrir sig.

Hlaupabólan mætt í kotið...

....allavega virðist vera svo.  Í morgun þegar ég var að bursta tennurnar í Þóri Snæ tók ég eftir því að hann var "flekkóttur" í andlitinu.  Svo þegar ég skipti á honum og klæddi hann í fyrir daginn sá ég að "flekkirnir" eða útbrotin náðu niður á kvið.  Ég benti Sigga á útbrotin og hann var á sama máli og ég, að líklegast væri hlaupabólan mætt.  Svo sem fínn tími til að fá hana núna fyrir utan hvað það er gott að klára hana líkt og aðra algenga barnasjúkdóma.

Þórir var reyndar nokkuð hress framan af degi nema hvað matarlystin var óvenju lítil.  Um miðjan dag horfði ég hinsvegar á hvernig hitinn hækkaði og stúfurinn minn varð dasaðari.  Sem betur fer náði hann að sofna í góða stund, þegar hann vaknaði var hann í raun mun veikari en áður en hann sofnaði.  Glær í augunum af hita,  vildi bara vera í fanginu á mér og orðinn svolítið vælinn.  Sem betur fer hef ég fengið hann til að drekka vel af vatni og öðrum vökva í dag og borða eitthvað smáræði.

Fyrir nóttina fékk hann stíl sem vonandi mun slá á hitann og draga úr verkjum ef einhverjir eru.  Veiki stúfurinn minn var fljótur að sofna og ég vona að nóttin verði góð og að hann nái að sofa vel og þar með við foreldrarnir líka.  Eins gott að vera sjálfur í góðu formi þegar veikt barn er á heimilinu.

Ferðalag til Immingham og Grimsby

Við fjölskyldan skelltum okkur í svolítið ferðalag í gærkvöldi.  Siggi var að vinna í hópaverkefni til klukkan 19:30 í gærkvöldi, náði í okkur mæðgin og svo lögðum við í hann sem leið lá eftir hraðbrautum frá Lancaster á vesturströndinni yfir til Grimsby á austurströndinni.  Þórir Snær svaf alla leið þar sem hann hafði ekki tekið sér blund yfir daginn og við fórum því beint á hótelið enda klukkan orðin býsna margt.   Við gistum á Premier Inn í Grimsby, þetta er hótelkeðja sem bíður upp á fín herbergi á sanngjörnu verði.

Í morgun skelltum við okkur svo á fætur og fórum í morgunverðarhlaðborðið, borðuðum vel til að eiga forða fram eftir degi.  Að morgunmatnum loknum hringdum við í skrifstofu Samskipa í Immingham, fórum þangað og vorum leidd að Arnarfelli, skipi Samskipa þar sem Bjössi frændi er kokkur.  Frábært að hitta Bjössa þó aðeins væri í stutta stund.  Hann kom með sendingu frá Íslandi, barnadótið okkar sem hefur verið í notkun hjá Ásu systur og Rúnari síðan í janúar þegar Urður Eva kom í heiminn.  Bjössi kom líka með "gúmmelaði" sem Ása hafði keypt fyrir okkar auk hangikjöts og Ora grænna bauna frá mömmu og pabba.  Jólin verða því ekki hangikjötslaus á Rutland Avenue.  Til að kóróna gleðina þá gaf Bjössi okkur líka súrmjólk sem mun fara vel með ALVÖRU Cheerios-inu sem við fengum að heiman.  Cheerios-ið sem fæst hér í Bretlandi er svo sætt að ég get/vil hlest ekki borðað það.  Í sendingunni var líka þónokkuð magn jólagjafa til fjölskyldunnar auk þess sem Bjössi tók jólagjafir til Belgíu og til Íslands frá okkur.  Frábært að geta sparað sendingakostnaðinn á þennan hátt, auk þess eru eða allavega stefna póstmenn í Bretlandi á verkfall svo einhverjar seinkunnir kunna að verða á póstflutningum.

Eftir að kveðja Bjössa héldum við á ný út á hraðbrautir Bretlands og ókum sem leið lá til Manchester, þar stoppuðum við aðeins í Costco heildversluninni og keyptum "aðeins" inn.  Tíminn leið og skólinn beið eftir Sigga sem fór beint á fyrirlestur að ferðalaginu loknu.  Við Þórir Snær áttum rólegan dag hér heima enda bæði ögn "tuskuleg" eftir rúmlega 500 km keyrslu á tæpum sólarhring.  Alltaf gott að koma heim eftir góða ferð.

 

"Var þetta hún?"

Spurði Siggi í morgun og átti þá við ófædda dóttur okkar sem lék á alls oddi í bumbunni.  Sú stutta var svo hress og spörkin svo kröftug að húsbóndanum þótti vert að athuga hvort ég hefði verið að gera eitthvað (veit ekki alveg hvað það hefði átt að vera) eða hvort höggin kæmu frá þeirri stuttu.

Jú það er líf og fjör hér á heimilinu og greinilegt að það á ekkert eftir að minnka eftir að janúar-drottningin kemur í heiminn

Hvað við erum og höfum verið að bardúsa

Nú er Siggi kominn á fullt í skólanum og er mjög ánægður með þá fyrirlestra og kennara sem hann hefur kynnst hingað til.  Einnig er hann búinn að skrá sig í skokkhóp og Tai Chi hóp svo þar ætti að vera komin fín leið fyrir hann til að fá útrás .  Reyndar er líka útivistarhópur sem fer í dagsferðir á sunnudögum og lengri ferðir einu sinni til tvisvar á önn, aldrei að vita nema hann skelli sér í hressandi gögnuferð um Vatnahéruðin sem eru hér rétt fyrir norðan okkur.

Við Þórir Snær höfum það sömuleiðis gott á daginn.  Förum í gönguferðir og á fjölskylduhitting bæði hér í hverfinu og í Barnamiðstöð sem rekin er af hinu opinbera.  Virkilega gaman fyrir okkur bæði að hitta annað fólk.

Í gær átti ég tíma hjá ljósmóðurinni minni, það er alltaf jafn gaman að heyra hjartslátturinn hjá krílinu.  En það er greinilegt að "sú stutta" er hress og kát því hjartslátturinn var sterkur og jafn.  Eftir þetta keyrðum við fjölskyldan sem leið lá til bæjar hér í nágrenni við Lancaster, þar vissi ég af stórri barnavöruverslun sem meðal annars selur kerruna sem við höfum verið að spá í.  Við byrjuðum reyndar á að fá okkur að borða á pub hliðina á búðinni.  Þarna á þessum pub var boðið upp á glæsilegt steikarhlaðborð fyrir sömu upphæð eða jafnvel lægri upphæð en kostar fyrir okkur að fara á skyndibitastað.  Vel mett eftir svínasteik, kalkún og naut, meðlæti, drykk og dessert fórum við yfir í barnavöruverslunina.  Við erum sem sagt að leita okkur að 2ja barnakerru sem "þolir okkur"

Þær kerrur sem stóðu uppúr í búðinni voru Out'n'About nipper 360 og Baby Jogger City mini, báðar mjög fínar kerrur sem hafa samt sem áður bæði kosti og galla.  Málið er bara að velja þá sem hefur færri galla að okkar áliti.  Þegar við gegnum út er það Baby Jogger sem hefur forskotið, spurning samt með dekkin á henni.  Mögulega færi ég frekar í Baby Jogger City Classic sem er í raun sama kerra en á betri dekkjum og með stillanlegu handfangi.  Já svona kerrupælingar eru skemmtilegar og gott að gefa sér góðan tíma í verkefnið.

Því næst keyrðum við til nágrannaborgarinnar Preston þar sem við kláruðum að kaupa þær jólagjafir sem sendar verða heim til Íslands með Bjössa frænda 19.október.   Kvöldið var rólegt hjá fjölskyldunni á Rutland Avenue sem er gott eftir góðan dag.

Upplýsingar!!!

Bara svo "aðdáendur" okkar viti þá er ég að vinna í því að fara í gegnum, flokka og dagsetja myndirnar okkar svo ég geti sett júní, júlí, ágúst og september inn á barnalandssíðuna sem fyrst.

Ég vona að þetta verkefni mitt gangi hratt og vel þrátt fyrir magnið

Latibær!!!!

Já svei mér þá ef það er ekki réttnefni fyrir heimilislífið hér á 52 Rutland Avenue í dag.  Þetta gildir þó aðallega um okkur Þóri Snæ þar sem Siggi fór í skólann í morgun of hélt stuttan fyrirlestur um efni að eigin vali.  Það verkefni var sett fyrir með það fyrir augum að kanna hæfni nemenda til þess að vera með kynningu.  Mjög sniðugt og eitthvað sem ég hefði vilja sjá í mínu námi í Edinborg.

Íbúar "Latabæjar" mæðginin Inga og Þórir tóku því rólega í morgun, röltu þó út á pósthús og í búð.  Við vorum komin heim fyrir hádegi og höfum verið í kósý-gír síðan þá.  Horfðum á barnaefni og héldum popp og djús veislu, Þóri Snæ fannst stórmerkilegt að sjá maísinn poppast (erum með glerlok á pottunum) og fannst á tíma alveg nóg um lætinn í pottinum.  Afraksturinn sló í gegn hjá okkur báðum   Ég ákvað að gleða skólastrákinn líka og bakaði hjónabandssælu með heimagerðri rabbarbarasultu, þar með var búið að gleðja alla íbúa í kotinu.

Mikið er lífið gott!!! 

Krakkamorgun í hverfinu

 

Við Þórir Snær skelltum okkur á krakkamorgun (toddler morgning) hér í hverfinu í morgun.   Þarna voru um 20 til 30 börn í bland við mömmur og ömmur.  Þórir Snær skemmti sér svakalega vel og naut þess að hlaupa um og leika sér með "nýtt" dót.   Ég notaði tækifærið og spjallaði við aðrar mömmur og var svo heppin að hitta eina sem býr hér í sömu götu og við. Þau fjölskyldan eru nýflutt til Lancaster, pabbinn kennir við Lancaster háskóla og mamman er heim með börnin tvö sem eru 3ja ára og 10 mánaða.  Við skiptumst á númerum og ætlum að vera í sambandi, vonandi að fara eitthvað út að ganga, með krakkana á leikvöll eða bara heimavið að leika og spjalla.

Alltaf gaman að kynnast nýju fólki og ekki verra þegar það býr við sömu götu og við.